bas itni rah gai ahl-e-wafa ki dastan baqi

bas itnī rah ga.ī ahl-e-vafā kī dāstāñ baaqī

sar-e-mahshar bhī hai zikr-e-jabīn-o-āstāñ baaqī

rahegā āshiyāñ bhī gar rahegā gulsitāñ baaqī

ye zid ab to rahegī 'umr bhar ai bāġhbāñ baaqī

maiñ har naqsh-e-qadam par jhuum ke sajde meñ girtā huuñ

rahe kyoñ ehtirām-e-kūcha-e-pīr-e-muġhāñ baaqī

miTā sakte nahīñ hashr-o-qayāmat bhī ye do chīzeñ

mire sajde raheñge aur un kā āstāñ baaqī

nazar jalvoñ meñ gum hai aur jalve gum nigāhoñ meñ

nahīñ ab koī parda mere un ke darmiyāñ baaqī

na phūñk un ko ḳhudā ke vāste a barq rahne de

inhīñ do chaar tinkoñ se hai nām-e-āshiyāñ baaqī

diyā saaqī ne apne sar se sadqa kar ke paimāna

na jab koī rahā jām-e-sharāb-e-arġhavāñ baaqī

abhī hone ko hai jin se taqāzā-e-ajal paiham

kuchh aise din bhī haiñ minjumla-e-umr-e-ravāñ baaqī

dam-e-āḳhir vo aañsū bhī girā mizhgāñ se bistar par

jo apne dard-e-dil kā rah gayā thā rāz-dāñ baaqī

na mujh sā bhī koī ho ḳhānumāñ barbād duniyā meñ

ki mar jaane pe bhī haiñ saikḌoñ barbādiyāñ baaqī

dam-e-ruḳhsat bas itnī aarzū hai ai chaman vaalo

hamāre baa'd bhī rakhnā ḳhayāl-e-āshiyāñ baaqī

jabīn-e-shauq meñ aisā bhī ik betāb sajda hai

ki hai laġhzish se jis kī ābrū-e-āstāñ baaqī

bahār-e-lāla-o-gul ho ki ho rang-e-shafaq 'afqar'

raheñgī hashr tak ḳhūn-e-vafā kī surḳhiyāñ baaqī

bas itni rah gai ahl-e-wafa ki dastan baqi

sar-e-mahshar bhi hai zikr-e-jabin-o-astan baqi

rahega aashiyan bhi gar rahega gulsitan baqi

ye zid ab to rahegi 'umr bhar ai baghban baqi

main har naqsh-e-qadam par jhum ke sajde mein girta hun

rahe kyon ehtiram-e-kucha-e-pir-e-mughan baqi

miTa sakte nahin hashr-o-qayamat bhi ye do chizen

mere sajde rahenge aur un ka aastan baqi

nazar jalwon mein gum hai aur jalwe gum nigahon mein

nahin ab koi parda mere un ke darmiyan baqi

na phunk un ko KHuda ke waste a barq rahne de

inhin do chaar tinkon se hai nam-e-ashiyan baqi

diya saqi ne apne sar se sadqa kar ke paimana

na jab koi raha jam-e-sharab-e-arghawan baqi

abhi hone ko hai jin se taqaza-e-ajal paiham

kuchh aise din bhi hain minjumla-e-umr-e-rawan baqi

dam-e-aKHir wo aansu bhi gira mizhgan se bistar par

jo apne dard-e-dil ka rah gaya tha raaz-dan baqi

na mujh sa bhi koi ho KHanuman barbaad duniya mein

ki mar jaane pe bhi hain saikDon barbaadiyan baqi

dam-e-ruKHsat bas itni aarzu hai ai chaman walo

hamare ba'd bhi rakhna KHayal-e-ashiyan baqi

jabin-e-shauq mein aisa bhi ek betab sajda hai

ki hai laghzish se jis ki aabru-e-astan baqi

bahaar-e-lala-o-gul ho ki ho rang-e-shafaq 'afqar'

rahengi hashr tak KHun-e-wafa ki surKHiyan baqi