bas KHayal aata hai apne ishq ki tashhir ka

bas ḳhayāl aatā hai apne ishq kī tash.hīr kā

varna duniyā dekhtī jalva dil-e-dil-gīr kā

bekasī karb-o-tanaffur Dhoñg hai tafkīr kā

merā honā ḳhud muḳhālif hai tirī tankīr kā

harkatoñ par hī agar hai barkatoñ kā inhisār

kyoñ tamāshā dekhte baiThe raheñ taqdīr kā

saañp ban kar loTtī haiñ ḳhvāhisheñ dil par mire

marsiya likhtā nahīñ maiñ sustī-e-tadbīr kā

dāvat-e-sad-aish idhar aur fitna-e-gesū udhar

us kī añgḌā.ī hai naqsha vādī-e-kashmīr kā

sail-e-ġham meñ hī sahī nikleñ to dil se hasrateñ

shukriya yādoñ kā is fan kā tirī tasvīr kā

tum ise dīvāngī samjho ki ab sāda-dilī

muntazir hai dil tumhārī hī nazar ke tiir kā

dil ke jis TukḌe ko dil se chāhtā thā 'sarfarāz'

ek dastāvez hai ab ġhair kī jāgīr kā

bas KHayal aata hai apne ishq ki tashhir ka

warna duniya dekhti jalwa dil-e-dil-gir ka

bekasi karb-o-tanaffur Dhong hai tafkir ka

mera hona KHud muKHalif hai teri tankir ka

harkaton par hi agar hai barkaton ka inhisar

kyon tamasha dekhte baiThe rahen taqdir ka

sanp ban kar loTti hain KHwahishen dil par mere

marsiya likhta nahin main susti-e-tadbir ka

dawat-e-sad-aish idhar aur fitna-e-gesu udhar

us ki angDai hai naqsha wadi-e-kashmir ka

sail-e-gham mein hi sahi niklen to dil se hasraten

shukriya yaadon ka is fan ka teri taswir ka

tum ise diwangi samjho ki ab sada-dili

muntazir hai dil tumhaari hi nazar ke tir ka

dil ke jis TukDe ko dil se chahta tha 'sarfaraaz'

ek dastawez hai ab ghair ki jagir ka