bas lamhe bhar mein faisla karna paDa mujhe

bas lamhe bhar meñ faisla karnā paḌā mujhe

sab chhoḌ-chhāḌ ghar se nikalnā paḌā mujhe

jab apnī sar-zamīn ne mujh ko na dī panāh

anjān vādiyoñ meñ utarnā paḌā mujhe

paañv meñ aable the thakan umr bhar kī thī

ruknā thā baiThnā thā pa chalnā paḌā mujhe

apnī parakh ke vāste tūfāñ ke darmiyāñ

mazbūt kashtiyoñ se utarnā paḌā mujhe

terī anā ke haath meñ the tere faisle

tū to badal na paayā badalnā paḌā mujhe

be-intihā tazād thā donoñ kī soch meñ

kuchh yuuñ bhī rāste ko badalnā paḌā mujhe

ye bhī huā ki bā-dil-e-nā-ḳhvāsta kabhī

zinda haqīqatoñ se mukarnā paḌā mujhe

yakjā rahā ik umr magar terī diid ko

mānind-e-musht-e-ḳhāk bikharnā paḌā mujhe

āġhāz apne bas meñ na anjām hī 'adīl'

ik zindagī guzār ke marnā paḌā mujhe

bas lamhe bhar mein faisla karna paDa mujhe

sab chhoD-chhaD ghar se nikalna paDa mujhe

jab apni sar-zamin ne mujh ko na di panah

anjaan wadiyon mein utarna paDa mujhe

panw mein aable the thakan umr bhar ki thi

rukna tha baiThna tha pa chalna paDa mujhe

apni parakh ke waste tufan ke darmiyan

mazbut kashtiyon se utarna paDa mujhe

teri ana ke hath mein the tere faisle

tu to badal na paya badalna paDa mujhe

be-intiha tazad tha donon ki soch mein

kuchh yun bhi raste ko badalna paDa mujhe

ye bhi hua ki ba-dil-e-na-KHwasta kabhi

zinda haqiqaton se mukarna paDa mujhe

yakja raha ek umr magar teri did ko

manind-e-musht-e-KHak bikharna paDa mujhe

aaghaz apne bas mein na anjam hi 'adil'

ek zindagi guzar ke marna paDa mujhe