bas mohabbat mein tera hijr kamaya hua hai

bas mohabbat meñ tirā hijr kamāyā huā hai

aur is hijr ko āñgan meñ ugāyā huā hai

tū jise dasht samajhtā hai ye ab dasht nahīñ

maiñ ne is dasht meñ ik shahr basāyā huā hai

ye jo ik raushnī pahlū se mire phūTtī hai

ye vahī zaḳhm hai jo tū ne lagāyā huā hai

aañkh sūraj se milāte hue katrātā huuñ

maiñ ne āñkhoñ meñ koī chāñd basāyā huā hai

rūThnā bhī nahīñ aatā na manānā tujh ko

pyaar ko tū ne tamāshā sā banāyā huā hai

vo mohabbat kā vo giit sunātā hai mujhe

maiñ ne 'ausāf' jo logoñ ko sikhāyā huā hai

bas mohabbat mein tera hijr kamaya hua hai

aur is hijr ko aangan mein ugaya hua hai

tu jise dasht samajhta hai ye ab dasht nahin

main ne is dasht mein ek shahr basaya hua hai

ye jo ek raushni pahlu se mere phuTti hai

ye wahi zaKHm hai jo tu ne lagaya hua hai

aankh suraj se milate hue katraata hun

main ne aankhon mein koi chand basaya hua hai

ruThna bhi nahin aata na manana tujh ko

pyar ko tu ne tamasha sa banaya hua hai

wo mohabbat ka wo git sunata hai mujhe

main ne 'ausaf' jo logon ko sikhaya hua hai