bas paikar-e-jaanan pe nazar khinch raha hun

bas paikar-e-jānāñ pe nazar khīñch rahā huuñ

maiñ saañs suhūlat se agar khīñch rahā huuñ

jo terī mohabbat kā ġham-e-hijr hai us ko

ḳhushiyoñ se ghaTā.ūñ to sifar khīñch rahā huuñ

maiñ apne muqaddar ko tire haath pe rakh kar

manzil se lagātār safar khīñch rahā huuñ

maiñ khīñch rahā huuñ kisī pencil se tirā husn

phir saath hī us ke maiñ rubber khīñch rahā huuñ

ik samt se tujh ko vo udhar khīñch rahā hai

ik samt se tujh ko maiñ idhar khīñch rahā huuñ

nabiyoñ meñ farishtoñ kā hunar dekhte haiñ log

maiñ un meñ chhupā ek bashar khīñch rahā huuñ

tum paḌh rahe ho sher mire lafz samajh kar

nādāñ maiñ magar ḳhūn-e-jigar khīñch rahā huuñ

bas paikar-e-jaanan pe nazar khinch raha hun

main sans suhulat se agar khinch raha hun

jo teri mohabbat ka gham-e-hijr hai us ko

KHushiyon se ghaTaun to sifar khinch raha hun

main apne muqaddar ko tere hath pe rakh kar

manzil se lagatar safar khinch raha hun

main khinch raha hun kisi pencil se tera husn

phir sath hi us ke main rubber khinch raha hun

ek samt se tujh ko wo udhar khinch raha hai

ek samt se tujh ko main idhar khinch raha hun

nabiyon mein farishton ka hunar dekhte hain log

main un mein chhupa ek bashar khinch raha hun

tum paDh rahe ho sher mere lafz samajh kar

nadan main magar KHun-e-jigar khinch raha hun