bas ruh sach hai baqi kahani fareb hai

bas ruuh sach hai baaqī kahānī fareb hai

jo kuchh bhī hai zamīnī zamānī fareb hai

rañg apne apne vaqt pe khulte haiñ aañkh par

avval fareb hai koī saanī fareb hai

saudāgarān-e-sho.alagī-e-shar ke dosh par

mushkīz-gāñ se jhāñktā paanī fareb hai

is ghūmtī zamīñ pe dobāra mileñge ham

hijrat farār naql-e-makānī fareb hai

dariyā kī asl tairtī lāshoñ se pochhiye

Thahrāv ek chaal ravānī fareb hai

ab shaam ho ga.ī hai to sūraj ko roiye

ham ne kahā na thā ki javānī fareb hai

bār-e-digar samay se kisī kā guzar nahīñ

ā.indagāñ ke haq meñ nishānī fareb hai

ilm ik hijāb aur havās aa.ine kā zañg

nisyān haq hai yād-dahānī fareb hai

tajsīm kar ki ḳhvāb kī duniyā hai jāvedāñ

taslīm kar ki ālam-e-fānī fareb hai

'shāhid' daroġh-goī-e-gulzār par na jā

titlī se pūchh rañg-fishānī fareb hai

bas ruh sach hai baqi kahani fareb hai

jo kuchh bhi hai zamini zamani fareb hai

rang apne apne waqt pe khulte hain aankh par

awwal fareb hai koi sani fareb hai

saudagaran-e-shoalagi-e-shar ke dosh par

mushkiz-gan se jhankta pani fareb hai

is ghumti zamin pe dobara milenge hum

hijrat farar naql-e-makani fareb hai

dariya ki asl tairti lashon se pochhiye

Thahraw ek chaal rawani fareb hai

ab sham ho gai hai to suraj ko roiye

hum ne kaha na tha ki jawani fareb hai

bar-e-digar samay se kisi ka guzar nahin

aaindagan ke haq mein nishani fareb hai

ilm ek hijab aur hawas aaine ka zang

nisyan haq hai yaad-dahani fareb hai

tajsim kar ki KHwab ki duniya hai jawedan

taslim kar ki aalam-e-fani fareb hai

'shahid' darogh-goi-e-gulzar par na ja

titli se puchh rang-fishani fareb hai