bas tamanna hai ishq-e-maula mein

bas tamannā hai ishq-e-maulā meñ

ki marūñ maiñ yahī tamannā meñ

ishq-e-ḳhūbāñ nahīñ hai aisī shai

bāñdh kar rakhiye jis ko puḌiyā meñ

ruḳh-e-afshāñ meñ tere ālam-e-nūr

nam qamar meñ hai nam surayyā meñ

yad-e-baizā kā hai ḳhayāl aatā

dekh mehñdī tire kaf-e-pā meñ

tere bīmār-e-hijr ai mahbūb

na to motī meñ haiñ na ahyā meñ

vahdahū-lā-sharīk-la hai tū

tujh sā duniyā meñ hai na uqbā meñ

tujh ko kyuuñ kar kaheñ ham harjā.ī

nuur to jalva-gar hai har jā meñ

kyā kahūñ din ko kis qadar royā

raat dilbar ko dekh ruuyā meñ

ishq lagte hī ho gayā ma.alūm

hāl-e-majnūñ ishq-e-lailā meñ

maraz-e-ishq husn-e-ḳhūbāñ kā

marg darmāñ hai naam hukamā meñ

hāsil-ul-amr ham hue badnām

ishq husn-e-butān-e-zebā meñ

ruḳh-e-yūsuf se ruḳh mushābah hai

lab haiñ milte lab-e-masīhā meñ

āb-e-bārāñ se gir na paa.e madad

ḳhaak paḌ jaa.e chashm-e-dariyā meñ

ye duā haq se hai mirā 'mātam'

dafn ho karbalā-muallā meñ

bas tamanna hai ishq-e-maula mein

ki marun main yahi tamanna mein

ishq-e-KHuban nahin hai aisi shai

bandh kar rakhiye jis ko puDiya mein

ruKH-e-afshan mein tere aalam-e-nur

nam qamar mein hai nam surayya mein

yad-e-baiza ka hai KHayal aata

dekh mehndi tere kaf-e-pa mein

tere bimar-e-hijr ai mahbub

na to moti mein hain na ahya mein

wahdahu-la-sharik-la hai tu

tujh sa duniya mein hai na uqba mein

tujh ko kyun kar kahen hum harjai

nur to jalwa-gar hai har ja mein

kya kahun din ko kis qadar roya

raat dilbar ko dekh ruya mein

ishq lagte hi ho gaya malum

haal-e-majnun ishq-e-laila mein

maraz-e-ishq husn-e-KHuban ka

marg darman hai nam hukama mein

hasil-ul-amr hum hue badnam

ishq husn-e-butan-e-zeba mein

ruKH-e-yusuf se ruKH mushabah hai

lab hain milte lab-e-masiha mein

aab-e-baran se gir na pae madad

KHak paD jae chashm-e-dariya mein

ye dua haq se hai mera 'matam'

dafn ho karbala-mualla mein