bas tishnagi thi gahre samundar mein kuchh na tha

bas tishnagī thī gahre samundar meñ kuchh na thā

us ke sivā hamāre muqaddar meñ kuchh na thā

kuchh ishq kī nazar ne tirā kaam kar diyā

varna kamāl husn ke paikar meñ kuchh na thā

sab kuchh luTā diyā thā tirī raah meñ faqat

īmān ke alāva mire ghar meñ kuchh na thā

raste kī Thokaroñ se vo manzil ko pā gayā

kaise kahūñ ki raah ke patthar meñ kuchh na thā

dard-o-alam milā na ḳhushī hī huī nasīb

shāyad mirī vafā ke muqaddar meñ kuchh na thā

royā tamām umr vo shabnam ke saath saath

phir kyoñ kahūñ ki dard-e-gul-e-tar meñ kuchh na thā

sunte the bhaa.ī bhaa.ī kā dushman hai par 'qamar'

dekhā to aisā shahr-e-sitamgar meñ kuchh na thā

bas tishnagi thi gahre samundar mein kuchh na tha

us ke siwa hamare muqaddar mein kuchh na tha

kuchh ishq ki nazar ne tera kaam kar diya

warna kamal husn ke paikar mein kuchh na tha

sab kuchh luTa diya tha teri rah mein faqat

iman ke alawa mere ghar mein kuchh na tha

raste ki Thokaron se wo manzil ko pa gaya

kaise kahun ki rah ke patthar mein kuchh na tha

dard-o-alam mila na KHushi hi hui nasib

shayad meri wafa ke muqaddar mein kuchh na tha

roya tamam umr wo shabnam ke sath sath

phir kyon kahun ki dard-e-gul-e-tar mein kuchh na tha

sunte the bhai bhai ka dushman hai par 'qamar'

dekha to aisa shahr-e-sitamgar mein kuchh na tha