bas zara der se ehsas hua tha mujhko

bas zarā der se ehsās huā thā mujh ko

vo bhī merī hī tarah soch rahā thā mujh ko

ye hī ik shaḳhs bhaTaktā hai jo sahrā sahrā

ek din shahr-e-tamannā meñ milā thā mujh ko

maiñ to maujūd thā har dam tire afsāne meñ

mere raavī ne magar maar diyā thā mujh ko

maiñ ne jab us ko batāyā to zarā abr chhaTā

us ne auroñ kī zabānī hī sunā thā mujh ko

aur phir kah hī diyā maiñ ne bhī ik din āmīn

vo duāoñ meñ bahut maañg rahā thā mujh ko

ho na ho vo pas-e-dīvār abhī hai maujūd

raushnī kā abhī ehsās huā thā mujh ko

ye na sochā thā ki is rañj pe honā hai tamām

ḳhatm honā hai ta.alluq ye patā thā mujh ko

ye jo pathrā.ī sī āñkheñ haiñ usī shaḳhs kī haiñ

jis ne raste meñ kabhī chhoḌ diyā thā mujh ko

iḳhtiyār us kā havāoñ pe nahīñ thā 'tāriq'

us ne dahlīz pe raushan to kiyā thā mujh ko

bas zara der se ehsas hua tha mujh ko

wo bhi meri hi tarah soch raha tha mujh ko

ye hi ek shaKHs bhaTakta hai jo sahra sahra

ek din shahr-e-tamanna mein mila tha mujh ko

main to maujud tha har dam tere afsane mein

mere rawi ne magar mar diya tha mujh ko

main ne jab us ko bataya to zara abr chhaTa

us ne auron ki zabani hi suna tha mujh ko

aur phir kah hi diya main ne bhi ek din aamin

wo duaon mein bahut mang raha tha mujh ko

ho na ho wo pas-e-diwar abhi hai maujud

raushni ka abhi ehsas hua tha mujh ko

ye na socha tha ki is ranj pe hona hai tamam

KHatm hona hai talluq ye pata tha mujh ko

ye jo pathrai si aankhen hain usi shaKHs ki hain

jis ne raste mein kabhi chhoD diya tha mujh ko

iKHtiyar us ka hawaon pe nahin tha 'tariq'

us ne dahliz pe raushan to kiya tha mujh ko