basar yun shab-e-umr kar jaunga

basar yuuñ shab-e-'umr kar jā.uñgā

koī ḳhvāb dekhūñgā Dar jā.uñgā

yahī sochtā ghar se duur aa gayā

koī rok legā Thahar jā.uñgā

agar ban na pā.egī koī jagah

to ḳhālī jagah koī bhar jā.uñgā

vo jab chāhe nazreñ badal saktā hai

maiñ jab chāhūñ us se mukar jā.uñgā

maiñ phir us se vā'da-ḳhilāfī ke baa'd

nayā koī paimān kar jā.uñgā

kisī aur dil meñ banā lūñgā ghar

jab us kī nazar se utar jā.uñgā

bhanak tak paḌegī na us ko zarā

dabe paañv yaañ se guzar jā.uñgā

rahe zid pe qaa.em agar us ke ashk

yahī hogā ik din sañvar jā.uñgā

ki ho rāsta vāpsī ke liye

maiñ dānista kuchh bhuul kar jā.uñgā

yuñhī marne vāloñ ko rote hue

'jamāl' ek din maiñ bhī mar jā.uñgā

basar yun shab-e-'umr kar jaunga

koi KHwab dekhunga Dar jaunga

yahi sochta ghar se dur aa gaya

koi rok lega Thahar jaunga

agar ban na paegi koi jagah

to KHali jagah koi bhar jaunga

wo jab chahe nazren badal sakta hai

main jab chahun us se mukar jaunga

main phir us se wa'da-KHilafi ke ba'd

naya koi paiman kar jaunga

kisi aur dil mein bana lunga ghar

jab us ki nazar se utar jaunga

bhanak tak paDegi na us ko zara

dabe panw yan se guzar jaunga

rahe zid pe qaem agar us ke ashk

yahi hoga ek din sanwar jaunga

ki ho rasta wapsi ke liye

main danista kuchh bhul kar jaunga

yunhi marne walon ko rote hue

'jamal' ek din main bhi mar jaunga