bashar ke faiz-e-sohbat se liyaqat aa hi jati hai

bashar ke faiz-e-sohbat se liyāqat aa hī jaatī hai

parī-zādoñ ko āḳhir ādmiyyat aa hī jaatī hai

javānī se diyā vo hote haiñ ġhāfil za'īfī meñ

nasīm-e-sub.h chaltī hai to ġhaflat aa hī jaatī hai

kilīd-e-qufl mushkil hotī hai dād-o-dahish āḳhir

saḳhī ke ek din aaḌe saḳhāvat aa hī jaatī hai

raqīb us shoḳh se jab garmiyāñ karte haiñ mahfil meñ

nahīñ qaabū meñ dil rahtā harārat aa hī jaatī hai

hameñ bhī yaad kar lete haiñ vo bhūle se sohbat meñ

kabhī ham be-nasīboñ kī bhī naubat aa hī jaatī hai

tabī'at ko na kyūñkar ġhair ke mazmūn se nafrat ho

ki jhūTī chiiz se aksar karāhat aa hī jaatī hai

bajā kahte haiñ jo kahte haiñ ye ḳhidmat se 'azmat hai

ki kaam insāñ ke ik din riyāzat aa hī jaatī hai

'ajab sar-garm-e-koshish ho muqaddar meñ jo hotī hai

to haath insāñ ke ik roz daulat aa hī jaatī hai

ta.assuf karte haiñ vo dekh kar merā dil-e-vīrāñ

ḳharābe par guzarte haiñ to ġhairat aa hī jaatī hai

dabāyā jab raqīboñ ko to bole yaar kyā kahnā

jo arbāb-e-hayā haiñ un ko ġhairat aa hī jaatī hai

hasīnoñ ko hī zebā husn-e-sūrat par ġhurūr apne

har ik arbāb-e-daulat ko ra'ūnat aa hī jaatī hai

'ajab shai hai ḳhushī bhī sun ke vasl-e-yār kā muzhda

marīz-e-hijr ke chehre pe vahshat aa hī jaatī hai

chhupāne se nahīñ chhuptā hai husn-e-dil-kash-e-ālam

kahīñ ho dekhne meñ achchhī sūrat aa hī jaatī hai

sikhā detā hai iqbāl aadmī ko nek-o-bad āḳhir

ye daulat hai vo shai shān-e-riyāsat aa hī jaatī hai

tavajjoh mun.imoñ kī naf' se ḳhālī nahīñ hotī

havā-e-gosha-e-dāmān-e-daulat aa hī jaatī hai

sitam-dīda jo haiñ vo zikr-e-āfat se bhī Darte haiñ

'qalaq' nām-e-shab-e-furqat se dahshat aa hī jaatī hai

bashar ke faiz-e-sohbat se liyaqat aa hi jati hai

pari-zadon ko aaKHir aadmiyyat aa hi jati hai

jawani se diya wo hote hain ghafil za'ifi mein

nasim-e-subh chalti hai to ghaflat aa hi jati hai

kilid-e-qufl mushkil hoti hai dad-o-dahish aaKHir

saKHi ke ek din aaDe saKHawat aa hi jati hai

raqib us shoKH se jab garmiyan karte hain mahfil mein

nahin qabu mein dil rahta hararat aa hi jati hai

hamein bhi yaad kar lete hain wo bhule se sohbat mein

kabhi hum be-nasibon ki bhi naubat aa hi jati hai

tabi'at ko na kyunkar ghair ke mazmun se nafrat ho

ki jhuTi chiz se aksar karahat aa hi jati hai

baja kahte hain jo kahte hain ye KHidmat se 'azmat hai

ki kaam insan ke ek din riyazat aa hi jati hai

'ajab sar-garm-e-koshish ho muqaddar mein jo hoti hai

to hath insan ke ek roz daulat aa hi jati hai

tassuf karte hain wo dekh kar mera dil-e-viran

KHarabe par guzarte hain to ghairat aa hi jati hai

dabaya jab raqibon ko to bole yar kya kahna

jo arbab-e-haya hain un ko ghairat aa hi jati hai

hasinon ko hi zeba husn-e-surat par ghurur apne

har ek arbab-e-daulat ko ra'unat aa hi jati hai

'ajab shai hai KHushi bhi sun ke wasl-e-yar ka muzhda

mariz-e-hijr ke chehre pe wahshat aa hi jati hai

chhupane se nahin chhupta hai husn-e-dil-kash-e-alam

kahin ho dekhne mein achchhi surat aa hi jati hai

sikha deta hai iqbaal aadmi ko nek-o-bad aaKHir

ye daulat hai wo shai shan-e-riyasat aa hi jati hai

tawajjoh munimon ki naf' se KHali nahin hoti

hawa-e-gosha-e-daman-e-daulat aa hi jati hai

sitam-dida jo hain wo zikr-e-afat se bhi Darte hain

'qalaq' nam-e-shab-e-furqat se dahshat aa hi jati hai