bashar ki zat ko gham se kahan mafar hai miyan

bashar kī zaat ko ġham se kahāñ mafar hai miyāñ

hazār kahiye koī ġham nahīñ magar hai miyāñ

safar meñ zād-e-safar hī to kaam aatā hai

safar ko sahl na jaano safar safar hai miyāñ

malāl kyā kareñ dastār ke na hone kā

vabāl-e-dosh yahāñ to ḳhud apnā sar hai miyāñ

ba-āfiyat guzar aa.e the har talātum se

magar kināre pe ab Dūbne kā Dar hai miyāñ

ye zindagī jo masā.il se par hai āḳhir tak

use basar bhī to karnā baḌā hunar hai miyāñ

jo poñchhe bhī koī aañsū to poñchhe kis kis ke

har ek aañkh yahāñ āñsuoñ se tar hai miyāñ

zamāna ho gayā bāzī-e-dil to haare hue

rahī hayāt so ab vo bhī daav par hai miyāñ

hai us kā tālib-e-dīd aa.ina bhī maiñ hī nahīñ

vo pur-kashish hai bahut jāzib-nazar hai miyāñ

ḳhushī to hastī-e-nā-mo.atabar na degī 'vaqār'

jo rishta ġham se hai vo phir bhī mo'atabar hai miyāñ

bashar ki zat ko gham se kahan mafar hai miyan

hazar kahiye koi gham nahin magar hai miyan

safar mein zad-e-safar hi to kaam aata hai

safar ko sahl na jaano safar safar hai miyan

malal kya karen dastar ke na hone ka

wabaal-e-dosh yahan to KHud apna sar hai miyan

ba-afiyat guzar aae the har talatum se

magar kinare pe ab Dubne ka Dar hai miyan

ye zindagi jo masail se par hai aaKHir tak

use basar bhi to karna baDa hunar hai miyan

jo ponchhe bhi koi aansu to ponchhe kis kis ke

har ek aankh yahan aansuon se tar hai miyan

zamana ho gaya bazi-e-dil to haare hue

rahi hayat so ab wo bhi daw par hai miyan

hai us ka talib-e-did aaina bhi main hi nahin

wo pur-kashish hai bahut jazib-nazar hai miyan

KHushi to hasti-e-na-moatabar na degi 'waqar'

jo rishta gham se hai wo phir bhi mo'atabar hai miyan