bashar ko jis se mayassar kabhi KHushi na hui

bashar ko jis se mayassar kabhī ḳhushī na huī

vo ik mazāq huā koī zindagī na huī

nazar kisī kī ujāloñ se bhar ga.ī dāman

charāġh ham ne jalā.e to raushnī na huī

ḳhudā kī aaḌ meñ kuchh log pūjte haiñ sanam

ise fareb kaho ye to bandagī na huī

tumhārī yaad ke marham se bhī sukūñ na milā

kisī tarah bhī mire dard meñ kamī na huī

vo jis pe ham bhī umīdoñ ke gul khilā sakte

vo shāḳh sahn-e-chaman meñ kabhī harī na huī

agar hai ‘ishq-e-haqīqī to jaañ nisār karo

salīb-o-dār se Darnā to 'āshiqī na huī

hazār shikve gile lab pe raqs karte rahe

vo jab mile to 'kañval' ham se baat bhī na huī

bashar ko jis se mayassar kabhi KHushi na hui

wo ek mazaq hua koi zindagi na hui

nazar kisi ki ujalon se bhar gai daman

charagh hum ne jalae to raushni na hui

KHuda ki aaD mein kuchh log pujte hain sanam

ise fareb kaho ye to bandagi na hui

tumhaari yaad ke marham se bhi sukun na mila

kisi tarah bhi mere dard mein kami na hui

wo jis pe hum bhi umidon ke gul khila sakte

wo shaKH sahn-e-chaman mein kabhi hari na hui

agar hai ‘ishq-e-haqiqi to jaan nisar karo

salib-o-dar se Darna to 'ashiqi na hui

hazar shikwe gile lab pe raqs karte rahe

wo jab mile to 'kanwal' hum se baat bhi na hui