basti basti bhuk ugi hai jangal jangal aag

bastī bastī bhuuk ugī hai jangal jangal aag

aaj kā insāñ khel rahā hai apne ḳhuuñ se phaag

saḌtī lāshoñ kī badbū se jiinā ek azaab

shahr-e-havas meñ lagī huī hai har-sū aag hī aag

is nagrī meñ chheḌ rahe ho tum gulāb kī baat

jis nagrī kā bachcha bachcha hai zahrīlā naag

chashm-zadan meñ Dheh jaa.e sab nafrat kī dīvār

bazm-e-vafā meñ chheḌo yaaro aisā koī raag

udhar chhalakte shīsha-o-sāġhar ḳhālī idhar gilās

saaqī se kyā shikva karnā apnā apnā bhaag

jin kā muqaddar lafz shanāsī se mahrūm 'samī.a'

mere fan par karte haiñ vo tanqīdeñ be-lāg

basti basti bhuk ugi hai jangal jangal aag

aaj ka insan khel raha hai apne KHun se phag

saDti lashon ki badbu se jina ek azab

shahr-e-hawas mein lagi hui hai har-su aag hi aag

is nagri mein chheD rahe ho tum gulab ki baat

jis nagri ka bachcha bachcha hai zahrila nag

chashm-zadan mein Dheh jae sab nafrat ki diwar

bazm-e-wafa mein chheDo yaro aisa koi rag

udhar chhalakte shisha-o-saghar KHali idhar gilas

saqi se kya shikwa karna apna apna bhag

jin ka muqaddar lafz shanasi se mahrum 'samia'

mere fan par karte hain wo tanqiden be-lag