بتا اے دل کہ نالوں سے ہوا کیا

بتا اے دل کہ نالوں سے ہوا کیا

ترے رونے سے وہ بت ڈر گیا کیا

جو تم پر مر مٹا مرنے سے پہلے

وہ کیا جانے بقا کیا ہے فنا کیا

نہ سمجھے ہم تو اب تک اس قدر بھی

کہ ان کی زلف پر خم ہے بلا کیا

وہ کہتے ہیں نقاب رخ ہٹا کر

حیا و شرم سے اب واسطہ کیا

مرا دل لے کے مجھ سے پھر گئے تم

کوئی ایسا بھی مطلب آشنا کیا

نہیں اور ہاں پہ اپنا فیصلہ ہے

ہماری ابتدا کیا انتہا کیا

کھڑے ہیں چپ دم آخر مرے سب

اطبا کیا عزیز و اقربا کیا

نہیں اس دور میں کوئی کسی کا

کسی کی اب شکایت کیا گلہ کیا

نہ رکھتے ہو ہنر کوئی نہ دولت

بتاؤ تو کرو گے تم عطاؔ کیا