bata ai zindagi tere parastaron ne kya paya

batā ai zindagī tere parastāroñ ne kyā paayā

uThā kar naaz tere nāz-bardāroñ ne kyā paayā

vo kāñTe hī sahī kuchh to diyā ham ko bayābāñ ne

magar gulshan se phūloñ ke talab-gāroñ ne kyā paayā

zarā ma.alūm to kiije ḳhirad par marne vāloñ se

ki Thukrā kar junūñ ko in ziyāñ-kāroñ ne kyā paayā

kaleja terā phaT jā.egā vaa.iz fart-e-hairat se

batā duuñ maiñ agar tujh ko gunahgāroñ ne kyā paayā

bayābāñ ġham na kar be-faizī-e-abr-e-bahārāñ kā

tirā dāman hai gar ḳhālī to gulzāroñ ne kyā paayā

ġham-e-hastī ġham-e-jānāñ ġham-e-duniyā ġham-e-daurāñ

miTā kar mujh ko 'fāzil' in sitam-gāroñ ne kyā paayā

bata ai zindagi tere parastaron ne kya paya

uTha kar naz tere naz-bardaron ne kya paya

wo kanTe hi sahi kuchh to diya hum ko bayaban ne

magar gulshan se phulon ke talab-garon ne kya paya

zara malum to kije KHirad par marne walon se

ki Thukra kar junun ko in ziyan-karon ne kya paya

kaleja tera phaT jaega waiz fart-e-hairat se

bata dun main agar tujh ko gunahgaron ne kya paya

bayaban gham na kar be-faizi-e-abr-e-bahaaran ka

tera daman hai gar KHali to gulzaron ne kya paya

gham-e-hasti gham-e-jaanan gham-e-duniya gham-e-dauran

miTa kar mujh ko 'fazil' in sitam-garon ne kya paya