bata kya kya tujhe ai shauq-e-hairan yaad aata hai

batā kyā kyā tujhe ai shauq-e-hairāñ yaad aatā hai

vo jān-e-ārzū vo rāhat-e-jāñ yaad aatā hai

pareshāñ-ḳhātirī had se guzartī hai to vahshat ko

kisī kā ālam-e-zulf-e-pareshāñ yaad aatā hai

guzartā hai kabhī jab chaudhvīñ kā chāñd badlī se

mahīn āñchal meñ un kā rū-e-tābāñ yaad aatā hai

añdherī raat meñ jugnū chamakte haiñ to rah rah kar

dupaTTe ke sitāroñ kā charāġhāñ yaad aatā hai

ufuq par phailtī haiñ surḳhiyāñ jab sub.h-e-tāza kī

koī siina pas-e-chāk-e-garebāñ yaad aatā hai

kalī ko phuul bante dekh kar ahd-e-bahārāñ meñ

koī chehra bahut nau-ḳhez-o-ḳhandāñ yaad aatā hai

ġhazal jab chheḌ detā hai koī ahd-e-javānī kī

kisī kā jism-e-mauzūn-o-ġhazal-ḳhvāñ yaad aatā hai

vo tūfāñ karvaTeñ letā thā jo ik jism-e-rā.anā meñ

vo tūfāñ ham-kinārī kā vo tūfāñ yaad aatā hai

vo armāñ jo kisī ke shoḳh hoñToñ par machaltā thā

vo armāñ bosa-e-lab kā vo armāñ yaad aatā hai

vufūr-e-shauq se ḳhud haath apne chuum letā huuñ

vufūr-e-shauq meñ jab un kā dāmāñ yaad aatā hai

bahut kuchh yaad aatā hai 'ra.īs' un kī judā.ī meñ

magar jaise koī ḳhvāb-e-pareshāñ yaad aatā hai

bata kya kya tujhe ai shauq-e-hairan yaad aata hai

wo jaan-e-arzu wo rahat-e-jaan yaad aata hai

pareshan-KHatiri had se guzarti hai to wahshat ko

kisi ka aalam-e-zulf-e-pareshan yaad aata hai

guzarta hai kabhi jab chaudhwin ka chand badli se

mahin aanchal mein un ka ru-e-taban yaad aata hai

andheri raat mein jugnu chamakte hain to rah rah kar

dupaTTe ke sitaron ka charaghan yaad aata hai

ufuq par phailti hain surKHiyan jab subh-e-taza ki

koi sina pas-e-chaak-e-gareban yaad aata hai

kali ko phul bante dekh kar ahd-e-bahaaran mein

koi chehra bahut nau-KHez-o-KHandan yaad aata hai

ghazal jab chheD deta hai koi ahd-e-jawani ki

kisi ka jism-e-mauzun-o-ghazal-KHwan yaad aata hai

wo tufan karwaTen leta tha jo ek jism-e-raana mein

wo tufan ham-kinari ka wo tufan yaad aata hai

wo arman jo kisi ke shoKH honTon par machalta tha

wo arman bosa-e-lab ka wo arman yaad aata hai

wufur-e-shauq se KHud hath apne chum leta hun

wufur-e-shauq mein jab un ka daman yaad aata hai

bahut kuchh yaad aata hai 'rais' un ki judai mein

magar jaise koi KHwab-e-pareshan yaad aata hai