بتا تو ہی کہ تیری یاد کیسے دور ہو دل سے

بتا تو ہی کہ تیری یاد کیسے دور ہو دل سے

بھرے دریا کی موجیں بھی کہیں ہٹتی ہیں ساحل سے

گل و لالہ تو ہیں اے باغباں خاموش تصویریں

چمن بیدار ہوتا ہے فقط شور عنادل سے

سنبھلنے دے ذرا اے ذوق غرقابی سنبھلنے دے

پکارا ہے کسی نے ڈوبنے والے کو ساحل سے

ارادہ اس مسافر کا کوئی سمجھے تو کیا سمجھے

ہزاروں بار جا کر جو پلٹ آیا ہو منزل سے

ادھر کی نرگس مخمور نے تیر افگنی زمزمؔ

ادھر اٹھی صدائے آفریں عشاق کے دل سے