bataun kya tumhein kis bojh se daba hua hun

batā.ūñ kyā tumheñ kis bojh se dabā huā huuñ

maiñ apne nafs kī tahzīb meñ lagā huā huuñ

bisāt-e-zīst agarche banī hai mere liye

magar piTā huā mohara bhī maiñ banā huā huuñ

yahāñ na chheḌ mire dost zikr-e-māzī ko

abhī to logoñ kī nazroñ meñ pārsā huā huuñ

zarā sā sabr khuleñge mire par-e-parvāz

nayā nayā qafas-e-ishq se rihā huā huuñ

kisī ke haath ke daav pe huuñ rakhā huā maiñ

kisī ke ḳhvāboñ kī had se bhī māvarā huā huuñ

mujhe na chheḌ ḳhudā ke liye na chheḌ mujhe

gale talak maiñ savālāt se bharā huā huuñ

maiñ jāntā huuñ 'qamar' kyā maqām hai merā

yahāñ buzurg nahīñ haiñ so maiñ baḌā huā huuñ

bataun kya tumhein kis bojh se daba hua hun

main apne nafs ki tahzib mein laga hua hun

bisat-e-zist agarche bani hai mere liye

magar piTa hua mohara bhi main bana hua hun

yahan na chheD mere dost zikr-e-mazi ko

abhi to logon ki nazron mein parsa hua hun

zara sa sabr khulenge mere par-e-parwaz

naya naya qafas-e-ishq se riha hua hun

kisi ke hath ke daw pe hun rakha hua main

kisi ke KHwabon ki had se bhi mawara hua hun

mujhe na chheD KHuda ke liye na chheD mujhe

gale talak main sawalat se bhara hua hun

main jaanta hun 'qamar' kya maqam hai mera

yahan buzurg nahin hain so main baDa hua hun