bayaban-e-junun mein sham-e-ghurbat jab sataya ki

bayābān-e-junūñ meñ shām-e-ġhurbat jab satāyā kī

mujhe rah rah ke ai sub.h-e-vatan tū yaad aayā kī

nigāh-e-mast idhar merī taraf sharmā ke dekhā kī

udhar merī tamanna muztarib ho ho ke taḌpā kī

ab ahl-e-hosh ko farhād-o-majnūñ yaad aate haiñ

jo sach pūchho to dīvānoñ se ābādī thī sahrā kī

pahuñch to le tumhārī bazm meñ lailā kā dīvāna

nazar nīchī na hogī is tumhāre nām-levā kī

mohabbat aur kahte haiñ kise do dil ke milne ko

chalo bas ho ga.ī fursat na ham shākī na tum shākī

saf-e-āḳhir meñ huuñ lekin mujhe ye faḳhr kyā kam hai

tirī āñkhoñ ne itnī bhiiḌ meñ merī nazar taakī

jo kuchh jalve ke pīchhe thā vo ab āñkhoñ ke aage hai

kahāñ pohñchī nigāheñ aap ke mahv-e-tamāshā kī

chaman se toḌ lī thī ek murjhā.ī kalī maiñ ne

bas itnī baat par duniyā kī duniyā ho ga.ī shākī

ho mauqa' bhī to shān-e-‘ishq ko ye kab gavāra hai

ki terī be-ruḳhī se daad le apnī tamanna kī

barahman kī nazar mil jaa.e to dekheñ haram vaale

butoñ ke husn meñ parchhā.iyāñ us rū-e-zebā kī

bharā aatā hai dil us sham'-e-afsurda kī qismat par

sahar se shaam tak jo raah par vāloñ kī dekhā kī

sabhī tere fidā.ī haiñ magar ai naujavāñ qātil

ye 'bismil' hī pe kyoñ āḳhir tirī talvār chamkā kī

bayaban-e-junun mein sham-e-ghurbat jab sataya ki

mujhe rah rah ke ai subh-e-watan tu yaad aaya ki

nigah-e-mast idhar meri taraf sharma ke dekha ki

udhar meri tamanna muztarib ho ho ke taDpa ki

ab ahl-e-hosh ko farhad-o-majnun yaad aate hain

jo sach puchho to diwanon se aabaadi thi sahra ki

pahunch to le tumhaari bazm mein laila ka diwana

nazar nichi na hogi is tumhaare nam-lewa ki

mohabbat aur kahte hain kise do dil ke milne ko

chalo bas ho gai fursat na hum shaki na tum shaki

saf-e-aKHir mein hun lekin mujhe ye faKHr kya kam hai

teri aankhon ne itni bhiD mein meri nazar taki

jo kuchh jalwe ke pichhe tha wo ab aankhon ke aage hai

kahan pohnchi nigahen aap ke mahw-e-tamasha ki

chaman se toD li thi ek murjhai kali main ne

bas itni baat par duniya ki duniya ho gai shaki

ho mauqa' bhi to shan-e-‘ishq ko ye kab gawara hai

ki teri be-ruKHi se dad le apni tamanna ki

barahman ki nazar mil jae to dekhen haram wale

buton ke husn mein parchhaiyan us ru-e-zeba ki

bhara aata hai dil us sham'-e-afsurda ki qismat par

sahar se sham tak jo rah par walon ki dekha ki

sabhi tere fidai hain magar ai naujawan qatil

ye 'bismil' hi pe kyon aaKHir teri talwar chamka ki