bayan-e-haal mufassal nahin hua ab tak

bayān-e-hāl mufassal nahīñ huā ab tak

jo mas.ala thā vahī hal nahīñ huā ab tak

nahīñ rahā kabhī maiñ is kī dastaras se duur

mirī nazar se vo ojhal nahīñ huā ab tak

bichhaḌ ke tujh se ye lagtā thā TuuT jā.ūñgā

ḳhudā kā shukr hai pāgal nahīñ huā ab tak

jalā.e rakkhā hai maiñ ne bhī ik charāġh-e-umīd

tumhārā dar bhī muqaffal nahīñ huā ab tak

mujhe tarāsh rahā hai ye kaun barsoñ se

mirā vajūd mukammal nahīñ huā ab tak

darāz dast-e-tamannā nahīñ kiyā maiñ ne

karam tumhārā musalsal nahīñ huā ab tak

baras kuchh aur mirī jaan TuuT ke mujh par

ye ḳhitta jism kā jal-thal nahīñ huā ab tak

na aayā baaz vo 'nāyāb' apnī fitrat se

vafā kā shahr bhī jañgal nahīñ huā ab tak

bayan-e-haal mufassal nahin hua ab tak

jo masala tha wahi hal nahin hua ab tak

nahin raha kabhi main is ki dastaras se dur

meri nazar se wo ojhal nahin hua ab tak

bichhaD ke tujh se ye lagta tha TuT jaunga

KHuda ka shukr hai pagal nahin hua ab tak

jalae rakkha hai main ne bhi ek charagh-e-umid

tumhaara dar bhi muqaffal nahin hua ab tak

mujhe tarash raha hai ye kaun barson se

mera wajud mukammal nahin hua ab tak

daraaz dast-e-tamanna nahin kiya main ne

karam tumhaara musalsal nahin hua ab tak

baras kuchh aur meri jaan TuT ke mujh par

ye KHitta jism ka jal-thal nahin hua ab tak

na aaya baz wo 'nayab' apni fitrat se

wafa ka shahr bhi jangal nahin hua ab tak