بیان کیا ہے جو اس سے بھی کچھ سوا سمجھیں

بیان کیا ہے جو اس سے بھی کچھ سوا سمجھیں

انہیں کہو کہ وہ دل کا معاملہ سمجھیں

کہو کہ کثرت کار جہاں کے ہوتے ہوئے

کسی کی یاد ستائے تو اس کو کیا سمجھیں

کہ سوئے دل چلی آتی ہیں لڑکیاں پہلے

پھر اس کے بعد یہ کہتی ہیں مسئلہ سمجھیں

یہ دور وہ نہیں لکھا ہے جو کتابوں میں

یہاں وفا کی اداکاری کو وفا سمجھیں

گزشتہ عشق کا غفلت میں کھل گیا ہے بھید

اگر یہ سب وہ نہ سمجھا تو پھر جدا سمجھیں

یہ کار زار چلاتا ہے کون اپنے سوا

کسے خدائی کہیں ہم کسے خدا سمجھیں

سپاہ دشمن دل قہقہہ لگا کے کہے

یہ اہل عشق ہیں ان کو مرا ہوا سمجھیں

خزانہ ڈھونڈنے نکلے تھے کھو گئے ہیں خود

کہا بھی تھا کہ پلٹنے کا راستہ سمجھیں