bazm aaKHir hui shamon ka dhuan baqi hai

bazm āḳhir huī sham.oñ kā dhuāñ baaqī hai

chashm-e-nam meñ shab-e-rafta kā samāñ baaqī hai

kaT ga.ī umr koī yaad na manzar na ḳhayāl

ek be-nām sā ehsās-e-ziyāñ baaqī hai

kis kī jānib nigarāñ haiñ mirī be-ḳhvāb āñkheñ

kyā koī marhala-e-umr-e-ravāñ baaqī hai

silsile us kī nigāhoñ ke bahut duur ga.e

kār-e-dil ḳhatm huā kār-e-jahāñ baaqī hai

haa.e ab tak vahī andāz-e-nazar hai us kā

ab bhī ik silsila-e-vahm-o-gumāñ baaqī hai

aaj ik umr meñ us aañkh ne pūchhā hai 'salīm'

ab bhī kyā pahlī sī be-tābī-e-jāñ baaqī hai

bazm aaKHir hui shamon ka dhuan baqi hai

chashm-e-nam mein shab-e-rafta ka saman baqi hai

kaT gai umr koi yaad na manzar na KHayal

ek be-nam sa ehsas-e-ziyan baqi hai

kis ki jaanib nigaran hain meri be-KHwab aankhen

kya koi marhala-e-umr-e-rawan baqi hai

silsile us ki nigahon ke bahut dur gae

kar-e-dil KHatm hua kar-e-jahan baqi hai

hae ab tak wahi andaz-e-nazar hai us ka

ab bhi ek silsila-e-wahm-o-guman baqi hai

aaj ek umr mein us aankh ne puchha hai 'salim'

ab bhi kya pahli si be-tabi-e-jaan baqi hai