bazm-e-‘alam mein KHuda jaane ye kya hota hai

bazm-e-‘ālam meñ ḳhudā jaane ye kyā hotā hai

jo bhī hotā hai vo vallāh bajā hotā hai

kuchh 'ajab Dhang sañvarne kā hai un ke dekho

nargisī chashm bhī surme se bharā hotā hai

dekh kar chāñd sitāre bhī haiñ ‘ash-‘ash karte

māñg-Tīke pe jo yāqūt jaḌā hotā hai

majlis-e-husn meñ pahuñche jo koī to dekhe

kāsa-e-bāda-e-gul-rang dharā hotā hai

bāda-ḳhvāroñ pe jo chhā jaatī hai mastī us dam

rang āñkhoñ meñ mohabbat kā chaḌhā hotā hai

māh-rūoñ se mohabbat to sarāsar hai sitam

nāznīnoñ pe kahīñ zulm ravā hotā hai

'ishq vo naḳhl hai jo ashk se sarsabz na ho

barq girtī hai to ye naḳhl harā hotā hai

qabr se qais ke har dam ye sadā aatī hai

dil lagānā kisī lailā se burā hotā hai

pūchhā farhād se kyoñ jaan ga.ī ulfat meñ

bolā hotā hai jo manzūr-e-ḳhudā hotā hai

al-ġharaz aag mohabbat kī jalā detī hai

jis tarah aag se sīmāb havā hotā hai

ik ‘afīfa hai tamannā liye baiThī 'ahqar'

is liye dard mirā had se baḌhā hotā hai

bazm-e-‘alam mein KHuda jaane ye kya hota hai

jo bhi hota hai wo wallah baja hota hai

kuchh 'ajab Dhang sanwarne ka hai un ke dekho

nargisi chashm bhi surme se bhara hota hai

dekh kar chand sitare bhi hain ‘ash-‘ash karte

mang-Tike pe jo yaqut jaDa hota hai

majlis-e-husn mein pahunche jo koi to dekhe

kasa-e-baada-e-gul-rang dhara hota hai

baada-KHwaron pe jo chha jati hai masti us dam

rang aankhon mein mohabbat ka chaDha hota hai

mah-ruon se mohabbat to sarasar hai sitam

nazninon pe kahin zulm rawa hota hai

'ishq wo naKHl hai jo ashk se sarsabz na ho

barq girti hai to ye naKHl hara hota hai

qabr se qais ke har dam ye sada aati hai

dil lagana kisi laila se bura hota hai

puchha farhad se kyon jaan gai ulfat mein

bola hota hai jo manzur-e-KHuda hota hai

al-gharaz aag mohabbat ki jala deti hai

jis tarah aag se simab hawa hota hai

ek ‘afifa hai tamanna liye baiThi 'ahqar'

is liye dard mera had se baDha hota hai