bazm-e-jaanan se lauT kar aae

bazm-e-jānāñ se lauT kar aa.e

phuul dāman meñ apne bhar laa.e

baat hī ham-nafas kuchh aisī thī

un kī mahfil meñ jā ke lauT aa.e

āshiyāñ to banā ke dam lūñgā

barq-e-ḳhātif hazār lahrā.e

raushnī hai na kuchh ujālā hai

har taraf zulmatoñ ke haiñ saa.e

terā dar chhoḌ ke ai jān-e-vafā

koī jaa.e to phir kahāñ jaa.e

kyā vo aa.e mire tasavvur meñ

mujh ko biite zamāne yaad aa.e

zaḳhm hī dil kā bhar gayā shāyad

varna hoñToñ pe yuuñ hañsī aa.e

jāntā hai savāb-e-tā.at-o-zohd

koī dil ko mire na samjhā.e

dard-e-dil kahte haiñ jise 'anjum'

un kī mus.haf se le ke ham aa.e

bazm-e-jaanan se lauT kar aae

phul daman mein apne bhar lae

baat hi ham-nafas kuchh aisi thi

un ki mahfil mein ja ke lauT aae

aashiyan to bana ke dam lunga

barq-e-KHatif hazar lahrae

raushni hai na kuchh ujala hai

har taraf zulmaton ke hain sae

tera dar chhoD ke ai jaan-e-wafa

koi jae to phir kahan jae

kya wo aae mere tasawwur mein

mujh ko bite zamane yaad aae

zaKHm hi dil ka bhar gaya shayad

warna honTon pe yun hansi aae

jaanta hai sawab-e-taat-o-zohd

koi dil ko mere na samjhae

dard-e-dil kahte hain jise 'anjum'

un ki mushaf se le ke hum aae