bazm-e-jaanan se nikalne ko to hum han nikle

bazm-e-jānāñ se nikalne ko to ham haañ nikle

ġhair kā bhī na ilāhī koī armāñ nikle

ishq ke mahr jo nikle to ye armāñ nikle

dil diyā jin ko vahī jaan ke ḳhvāhāñ nikle

ġham na nikle mire dil se to kahīñ jaañ nikle

ek armān to ai kasrat-e-hirmāñ nikle

bazm-e-duniyā meñ nahīñ naam ko jam.iyyat-e-dil

mutma.in aa.e the ham aur pareshāñ nikle

pamba-e-dāġh-e-jigar kuchh jo uThā duuñ to abhī

uñgliyāñ uThtī haiñ vo aḳhtar-e-tābāñ nikle

mehrbāñ jaan ke dil jin ko diyā thā ham ne

vo sitamgār sitam-kesh sitam-rāñ nikle

tū ne ai soz-e-darūñ phūñk diye jān-o-jigar

dil se naale bhī jo nikle sharar-afshāñ nikle

aap kī bazm meñ ham aap se milne ke liye

ḳhush ḳhush aa.e the magar kyā hī pashemāñ nikle

gardish-e-charḳh ke qaa.il hoñ jab apnī bhī kabhī

koī hasrat kabhī nikle koī armāñ nikle

aap hoñ jalva-numā raat ko mahtābī par

ham bhī to dekheñ ki kyoñ kar mah-e-tābāñ nikle

mahr ye husn-e-gulo-soz hai vo hosh-rubā

ā.ina-ḳhāne se vo aap bhī hairāñ nikle

bazm-e-jaanan se nikalne ko to hum han nikle

ghair ka bhi na ilahi koi arman nikle

ishq ke mahr jo nikle to ye arman nikle

dil diya jin ko wahi jaan ke KHwahan nikle

gham na nikle mere dil se to kahin jaan nikle

ek arman to ai kasrat-e-hirman nikle

bazm-e-duniya mein nahin nam ko jamiyyat-e-dil

mutmain aae the hum aur pareshan nikle

pamba-e-dagh-e-jigar kuchh jo uTha dun to abhi

ungliyan uThti hain wo aKHtar-e-taban nikle

mehrban jaan ke dil jin ko diya tha hum ne

wo sitamgar sitam-kesh sitam-ran nikle

tu ne ai soz-e-darun phunk diye jaan-o-jigar

dil se nale bhi jo nikle sharar-afshan nikle

aap ki bazm mein hum aap se milne ke liye

KHush KHush aae the magar kya hi pasheman nikle

gardish-e-charKH ke qail hon jab apni bhi kabhi

koi hasrat kabhi nikle koi arman nikle

aap hon jalwa-numa raat ko mahtabi par

hum bhi to dekhen ki kyon kar mah-e-taban nikle

mahr ye husn-e-gulo-soz hai wo hosh-ruba

aaina-KHane se wo aap bhi hairan nikle