بزم جاناں سے نکلنے کو تو ہم ہاں نکلے

بزم جاناں سے نکلنے کو تو ہم ہاں نکلے

غیر کا بھی نہ الٰہی کوئی ارماں نکلے

عشق کے مہر جو نکلے تو یہ ارماں نکلے

دل دیا جن کو وہی جان کے خواہاں نکلے

غم نہ نکلے مرے دل سے تو کہیں جاں نکلے

ایک ارمان تو اے کثرت حرماں نکلے

بزم دنیا میں نہیں نام کو جمعیت دل

مطمئن آئے تھے ہم اور پریشاں نکلے

پنبۂ داغ جگر کچھ جو اٹھا دوں تو ابھی

انگلیاں اٹھتی ہیں وہ اختر تاباں نکلے

مہرباں جان کے دل جن کو دیا تھا ہم نے

وہ ستم گار ستم کیش ستم راں نکلے

تو نے اے سوز دروں پھونک دئے جان و جگر

دل سے نالے بھی جو نکلے شرر افشاں نکلے

آپ کی بزم میں ہم آپ سے ملنے کے لئے

خوش خوش آئے تھے مگر کیا ہی پشیماں نکلے

گردش چرخ کے قائل ہوں جب اپنی بھی کبھی

کوئی حسرت کبھی نکلے کوئی ارماں نکلے

آپ ہوں جلوہ نما رات کو مہتابی پر

ہم بھی تو دیکھیں کہ کیوں کر مہ تاباں نکلے

مہر یہ حسن گلو سوز ہے وہ ہوش ربا

آئنہ خانے سے وہ آپ بھی حیراں نکلے