bazm-e-jahan-e-shauq ka mehwar bhi main hi tha

bazm-e-jahān-e-shauq kā mehvar bhī maiñ hī thā

aurāq-e-dil pe harf-e-mukarrar bhī maiñ hī thā

jitne bhī 'aks the mire atrāf mere the

andar bhī aa.ine ke maiñ bāhar bhī maiñ hī thā

barsoñ se jis pe koī bhī dastak nahīñ huī

is shahr-e-be-charāġh meñ vo dar bhī maiñ hī thā

maiñ ne hī us ke husn ko baḳhshī thī dilkashī

us paikar-e-jamāl kā maz.har bhī maiñ hī thā

ilzām-e-nā-murādī-e-manzil maiñ kis ko duuñ

ḳhud apnī rahguzār kā patthar bhī maiñ hī thā

dekhā to duur tak mirā ham-sar na thā koī

sochā to apne qad ke barābar bhī maiñ hī thā

bazm-e-suḳhan kī raunaqeñ sab mere dam se thiiñ

shahr-e-suḳhanvarāñ meñ suḳhanvar bhī maiñ hī thā

bazm-e-jahan-e-shauq ka mehwar bhi main hi tha

auraq-e-dil pe harf-e-mukarrar bhi main hi tha

jitne bhi 'aks the mere atraf mere the

andar bhi aaine ke main bahar bhi main hi tha

barson se jis pe koi bhi dastak nahin hui

is shahr-e-be-charagh mein wo dar bhi main hi tha

main ne hi us ke husn ko baKHshi thi dilkashi

us paikar-e-jamal ka mazhar bhi main hi tha

ilzam-e-na-muradi-e-manzil main kis ko dun

KHud apni rahguzar ka patthar bhi main hi tha

dekha to dur tak mera ham-sar na tha koi

socha to apne qad ke barabar bhi main hi tha

bazm-e-suKHan ki raunaqen sab mere dam se thin

shahr-e-suKHanwaran mein suKHanwar bhi main hi tha