bazm-e-KHuban se uThe dar-o-rasan tak pahunche

bazm-e-ḳhūbāñ se uThe dār-o-rasan tak pahuñche

aap hī aap mire paañv gagan tak pahuñche

ek maiñ hī thā jo sayyād kī jholī meñ girā

uḌ ga.e saare parinde jo chaman tak pahuñche

sirf dil hī ko jalānā to koī baat nahīñ

ishq ik aag agar hai to badan tak pahuñche

bandishoñ hī kī numā.ish hai hayāt-e-ādam

ek dhāge se bañdhe aur kafan tak pahuñche

umr kamtar hī se koshish thī musalsal jaarī

sher apnā bhī koī tarz-e-suḳhan tak pahuñche

āḳhirī ek ye ḳhvāhish hai mire siine meñ

ḳhaak jab merī uḌe apne vatan tak pahuñche

sharm kā phuul maiñ āñkhoñ se terī chun lūñgā

is se pahle ki jhaḌe aur dahan tak pahuñche

āsmānoñ ko dabā legā vo pairoñ ke tale

shauq insān kā gar us kī lagan tak pahuñche

kyā zarūrat ki kareñ chal ke tavāf-e-duniyā

fikr apnī ye agar gañg-o-jaman tak pahuñche

soch lenā thā tujhe itnā ki kyā hogā 'nadīm'

aaj kā sher agar tere sajan tak pahuñche

bazm-e-KHuban se uThe dar-o-rasan tak pahunche

aap hi aap mere panw gagan tak pahunche

ek main hi tha jo sayyaad ki jholi mein gira

uD gae sare parinde jo chaman tak pahunche

sirf dil hi ko jalana to koi baat nahin

ishq ek aag agar hai to badan tak pahunche

bandishon hi ki numaish hai hayat-e-adam

ek dhage se bandhe aur kafan tak pahunche

umr kamtar hi se koshish thi musalsal jari

sher apna bhi koi tarz-e-suKHan tak pahunche

aaKHiri ek ye KHwahish hai mere sine mein

KHak jab meri uDe apne watan tak pahunche

sharm ka phul main aankhon se teri chun lunga

is se pahle ki jhaDe aur dahan tak pahunche

aasmanon ko daba lega wo pairon ke tale

shauq insan ka gar us ki lagan tak pahunche

kya zarurat ki karen chal ke tawaf-e-duniya

fikr apni ye agar gang-o-jaman tak pahunche

soch lena tha tujhe itna ki kya hoga 'nadim'

aaj ka sher agar tere sajan tak pahunche