bazm-e-rang-o-nur mein sahib-nazar koi nahin

bazm-e-rang-o-nūr meñ sāhib-nazar koī nahīñ

dekhne vaale bahut haiñ dīda-var koī nahīñ

ham ko virse meñ milā hai vo makāñ ajdād se

jis meñ dīvāreñ hī dīvāreñ haiñ dar koī nahīñ

har galī kūche meñ ab shams-o-qamar bikne lage

ab ḳharīdār-e-charāġh-e-chashm-e-tar koī nahīñ

yuuñ taḳhayyul meñ haqā.eq kī milāvaT ho ga.ī

ab fasānoñ meñ bhī harf-e-mo'tabar koī nahīñ

maiñ na.ī manzil ko niklā huuñ purānī raah par

mere hamrāhī bahut haiñ ham-safar koī nahīñ

ahl-e-dil to ḳhair sab sūd-o-ziyāñ meñ paḌ ga.e

kyā ḳhirad-mandoñ meñ bhī āshufta-sar koī nahiñ

bazm-e-rang-o-nur mein sahib-nazar koi nahin

dekhne wale bahut hain dida-war koi nahin

hum ko wirse mein mila hai wo makan ajdad se

jis mein diwaren hi diwaren hain dar koi nahin

har gali kuche mein ab shams-o-qamar bikne lage

ab KHaridar-e-charagh-e-chashm-e-tar koi nahin

yun taKHayyul mein haqaeq ki milawaT ho gai

ab fasanon mein bhi harf-e-mo'tabar koi nahin

main nai manzil ko nikla hun purani rah par

mere hamrahi bahut hain ham-safar koi nahin

ahl-e-dil to KHair sab sud-o-ziyan mein paD gae

kya KHirad-mandon mein bhi aashufta-sar koi nahin