bazm-e-sahba mein achanak shor barpa ho gaya

bazm-e-sahbā meñ achānak shor barpā ho gayā

TuuT kar zāhid kā chaknā-chūr taqvā ho gayā

gardish-e-daurāñ ke hāthoñ kā khilaunā ho gayā

sochtā huuñ mujh ko kyā honā thā maiñ kyā ho gayā

kasmapursī kā ye 'ālam hai mashīnī daur meñ

bhiiḌ meñ rahte hue insān tanhā ho gayā

vaqt ke marham ne dikhlāyā to thā apnā asar

ek hichkī meñ hī saarā khel ulTā ho gayā

roz-e-avval se zamīñ ne zahr uglā is qadar

pīte-pīte āsmāñ kā rang niilā ho gayā

aap ke qadmoñ kī ḳhātir hī maiñ laayā thā magar

haath lagne se mirā vo phuul mailā ho gayā

mudda'ā lā kar zabāñ par 'nazr' phir rusvā na ho

aaj tak to ye huā jo us ne chāhā ho gayā

bazm-e-sahba mein achanak shor barpa ho gaya

TuT kar zahid ka chakna-chur taqwa ho gaya

gardish-e-dauran ke hathon ka khilauna ho gaya

sochta hun mujh ko kya hona tha main kya ho gaya

kasmapursi ka ye 'alam hai mashini daur mein

bhiD mein rahte hue insan tanha ho gaya

waqt ke marham ne dikhlaya to tha apna asar

ek hichki mein hi sara khel ulTa ho gaya

roz-e-awwal se zamin ne zahr ugla is qadar

pite-pite aasman ka rang nila ho gaya

aap ke qadmon ki KHatir hi main laya tha magar

hath lagne se mera wo phul maila ho gaya

mudda'a la kar zaban par 'nazr' phir ruswa na ho

aaj tak to ye hua jo us ne chaha ho gaya