bazm-e-taKHayyulat mein matam hai in dinon

bazm-e-taḳhayyulāt meñ mātam hai in dinoñ

be-kaif-o-be-surūr sā 'ālam hai in dinoñ

monis hai koī apnā na hamdam hai in dinoñ

jis par thā e'timād vo barham hai in dinoñ

soyā huā hai izn-e-musāvāt āj-kal

tahrīk shorishoñ kī munazzam hai in dinoñ

insāniyat ke bhes meñ 'uryāñ darindagī

shaitāniyat kā daur mujassam hai in dinoñ

hirmāñ-nasīb sar pe balā.eñ haiñ sad-hazār

insāñ pe jaur-e-gardish-e-paiham hai in dinoñ

kirnoñ se pūchh apnī zarā mehr-e-hurriyat

insāñ kā ḳhuun qatra-e-shabnam hai in dinoñ

bhūlā huā hai apne farā.ez ko har bashar

jo kuchh bhī ho rahā hai sitam kam hai in dinoñ

khultā nahīñ ye rāz-e-ḳhamoshī jahān par

sar hurriyat-pasand kā kyoñ ḳham hai in dinoñ

'zamzam' ye inqalāb nirālā hai kyā kaheñ

āzādī-e-vatan kī ḳhushī ġham hai in dinoñ

bazm-e-taKHayyulat mein matam hai in dinon

be-kaif-o-be-surur sa 'alam hai in dinon

monis hai koi apna na hamdam hai in dinon

jis par tha e'timad wo barham hai in dinon

soya hua hai izn-e-musawat aaj-kal

tahrik shorishon ki munazzam hai in dinon

insaniyat ke bhes mein 'uryan darindagi

shaitaniyat ka daur mujassam hai in dinon

hirman-nasib sar pe balaen hain sad-hazar

insan pe jaur-e-gardish-e-paiham hai in dinon

kirnon se puchh apni zara mehr-e-hurriyat

insan ka KHun qatra-e-shabnam hai in dinon

bhula hua hai apne faraez ko har bashar

jo kuchh bhi ho raha hai sitam kam hai in dinon

khulta nahin ye raaz-e-KHamoshi jahan par

sar hurriyat-pasand ka kyon KHam hai in dinon

'zamzam' ye inqalab nirala hai kya kahen

aazadi-e-watan ki KHushi gham hai in dinon