bazm mein wo sarfaraazi ki alamat le gae

bazm meñ vo sarfarāzī kī alāmat le ga.e

jab ga.e to saath merā qadd-o-qāmat le ga.e

ye ġhanīmat hai ki us kū-e-dil-āzārī se ham

bārish-e-sañg-e-sitam meñ sar salāmat le ga.e

pesh karne ko na thā kuchh bhī tahī-dastoñ ke paas

shahr-e-be-tauqīr se zād-e-nadāmat le ga.e

koī bhī āsār jis ke apne chehre par na the

ham chhupā kar dhaḌkanoñ meñ vo qayāmat le ga.e

sāya-e-amn-o-amāñ meñ āshnā sote rahe

ham tan-e-tanhā ye ambār-e-malāmat le ga.e

anjuman meñ us kī 'mohsin' chand baune jam.a the

tum vahāñ kis zo.am meñ ye qadd-o-qāmat le ga.e

bazm mein wo sarfaraazi ki alamat le gae

jab gae to sath mera qadd-o-qamat le gae

ye ghanimat hai ki us ku-e-dil-azari se hum

barish-e-sang-e-sitam mein sar salamat le gae

pesh karne ko na tha kuchh bhi tahi-daston ke pas

shahr-e-be-tauqir se zad-e-nadamat le gae

koi bhi aasar jis ke apne chehre par na the

hum chhupa kar dhaDkanon mein wo qayamat le gae

saya-e-amn-o-aman mein aashna sote rahe

hum tan-e-tanha ye ambar-e-malamat le gae

anjuman mein us ki 'mohsin' chand baune jama the

tum wahan kis zoam mein ye qadd-o-qamat le gae