bazm sanwarun ghazlen gaun

bazm sañvārūñ ġhazleñ gā.ūñ

jiine ke andāz banā.ūñ

har dam ro ro ḳhuun ke aañsū

kyuuñ āñkhoñ kī aab gañvā.ūñ

kab tak dil ke bahkāne par

taare gin gin raat bitā.ūñ

in ko merā dhyān nahīñ hai

maiñ kyuuñ apnī jaan gañvā.ūñ

merā ġham kis ne khāyā hai

maiñ kyuuñ duniyā kā ġham khā.ūñ

sab se tark-e-ta.alluq kar luuñ

ḳhud se rasm-o-rāh baḌhā.ūñ

marne vāloñ ko marne duuñ

jiine vāloñ ko apnā.ūñ

har mayyat ke sirhāne 'shohrat'

naġhme chheḌūñ jashn manā.ūñ

bazm sanwarun ghazlen gaun

jine ke andaz banaun

har dam ro ro KHun ke aansu

kyun aankhon ki aab ganwaun

kab tak dil ke bahkane par

tare gin gin raat bitaun

in ko mera dhyan nahin hai

main kyun apni jaan ganwaun

mera gham kis ne khaya hai

main kyun duniya ka gham khaun

sab se tark-e-talluq kar lun

KHud se rasm-o-rah baDhaun

marne walon ko marne dun

jine walon ko apnaun

har mayyat ke sirhane 'shohrat'

naghme chheDun jashn manaun