بے عمل پھول پھل نہیں سکتے

بے عمل پھول پھل نہیں سکتے

جیسے معذور چل نہیں سکتے

آگ گلزار ہو تو سکتی ہے

آگ پر ہم ہی چل نہیں سکتے

ہم سے پہلے چلے تو ہیں کچھ لوگ

ہم سے آگے نکل نہیں سکتے

بت کدے کے ہوں یا حرم کے چراغ

بے جلائے تو جل نہیں سکتے

کون مانے گا اپنی سچائی

ہم ہواؤں پہ چل نہیں سکتے

لوگ دنیا بدلنا چاہتے ہیں

اور خود کو بدل نہیں سکتے

خاک اجالوں کی طرح پھیلیں گے

جو چراغوں سا جل نہیں سکتے

موت انجام کیوں نہ ہو زیباؔ

ہم ارادے بدل نہیں سکتے