be-chaargi-e-dosh hai aur bar-e-garan hai

be-chārgī-e-dosh hai aur bār-e-garāñ hai

iz.hār pe pābandī hai aur muñh meñ zabāñ hai

hotā hai yahāñ roz mire dard kā saudā

ai teġh-ba-kaf roz-e-mukāfāt kahāñ hai

āzād karo ḳhuun ko bāzār meñ laao

sadiyoñ se ye mahkūm ragoñ hī meñ ravāñ hai

haañ rañg-e-bahārāñ hai magar us ke lahū se

jo dast-ba-dil mohr-ba-lab dard-ba-jāñ hai

har samt hai bāzār khulā hirs-o-havas kā

har shahr meñ har kūche meñ vaa.iz kī dukāñ hai

kal kis ko zabāñ band karoge zarā socho

kal dekhoge ham ko ki zabāñ hai na dahāñ hai

kis shahr-e-ḳhamoshāñ meñ chale aa.e haiñ ham log

ne zor-e-sināñ hai na kahīñ shor-e-fuġhāñ hai

har dard kī had hotī hai yuuñ lagtā hai jaise

is dard kā koī na zamāñ hai na makāñ hai

be-chaargi-e-dosh hai aur bar-e-garan hai

izhaar pe pabandi hai aur munh mein zaban hai

hota hai yahan roz mere dard ka sauda

ai tegh-ba-kaf roz-e-mukafat kahan hai

aazad karo KHun ko bazar mein lao

sadiyon se ye mahkum ragon hi mein rawan hai

han rang-e-bahaaran hai magar us ke lahu se

jo dast-ba-dil mohr-ba-lab dard-ba-jaan hai

har samt hai bazar khula hirs-o-hawas ka

har shahr mein har kuche mein waiz ki dukan hai

kal kis ko zaban band karoge zara socho

kal dekhoge hum ko ki zaban hai na dahan hai

kis shahr-e-KHamoshan mein chale aae hain hum log

ne zor-e-sinan hai na kahin shor-e-fughan hai

har dard ki had hoti hai yun lagta hai jaise

is dard ka koi na zaman hai na makan hai