بے چارگئ دوش ہے اور بار گراں ہے

بے چارگئ دوش ہے اور بار گراں ہے

اظہار پہ پابندی ہے اور منہ میں زباں ہے

ہوتا ہے یہاں روز مرے درد کا سودا

اے تیغ بکف روز مکافات کہاں ہے

آزاد کرو خون کو بازار میں لاؤ

صدیوں سے یہ محکوم رگوں ہی میں رواں ہے

ہاں رنگ بہاراں ہے مگر اس کے لہو سے

جو دست بہ دل مہر بہ لب درد بجاں ہے

ہر سمت ہے بازار کھلا حرص و ہوس کا

ہر شہر میں ہر کوچے میں واعظ کی دکاں ہے

کل کس کو زباں بند کرو گے ذرا سوچو

کل دیکھو گے ہم کو کہ زباں ہے نہ دہاں ہے

کس شہر خموشاں میں چلے آئے ہیں ہم لوگ

نے زور سناں ہے نہ کہیں شور فغاں ہے

ہر درد کی حد ہوتی ہے یوں لگتا ہے جیسے

اس درد کا کوئی نہ زماں ہے نہ مکاں ہے