بے چہرگیٔ ذات کا مفہوم رہے ہیں

بے چہرگیٔ ذات کا مفہوم رہے ہیں

ہم حلقہ بگوشوں میں بھی معدوم رہے ہیں

تم ناصیہ فرسائی کو در ڈھونڈنے جاؤ

ہم نقش کف پائے انا چوم رہے ہیں

ہم شاعر اکبر کی فصاحت کے نگینے

ہر رنگ میں ہر روپ میں منظوم رہے ہیں

کیا معجزہ اس خاک سے پھوٹے گا جہاں لوگ

پانی سے نہیں پیاس سے محروم رہے ہیں

اے دست یقیں لمس تیقن کا عطا کر

اک عرصے سے ہم نقطۂ موہوم رہے ہیں

اب کون یہ سمجھے گا سفرؔ بر سر مقتل

ہم لرزہ بر اندام ہیں یا جھوم رہے ہیں