be-chehragi ke shahr mein chehra talash kar

be-chehragī ke shahr meñ chehra talāsh kar

betāb regzār meñ saaya talāsh kar

mahrūmiyoñ kā apnī izāla talāsh kar

vaj.h-e-shikoh-o-shān-e-guzishta talāsh kar

jis se dil-o-dimāġh ko āsūdgī mile

daur-e-hayāt meñ vahī lamha talāsh kar

aahan pe sang-o-ḳhisht chalāne se fā.eda

mashq-e-sitam dikhāne ko shīsha talāsh kar

jis rasm se ‘urūs-e-vafā sharmsār ho

us rasm se farār kā rasta talāsh kar

pākī-e-rūh-o-tazkiyā-e-qalb ke liye

'irfān-e-zāt kā hī zarīya talāsh kar

hirs-o-havas kī dhuup basārat na chhīn le

'betāb' dil kī aañkh kā surma talāsh kar

be-chehragi ke shahr mein chehra talash kar

betab regzar mein saya talash kar

mahrumiyon ka apni izala talash kar

wajh-e-shikoh-o-shan-e-guzishta talash kar

jis se dil-o-dimagh ko aasudgi mile

daur-e-hayat mein wahi lamha talash kar

aahan pe sang-o-KHisht chalane se faeda

mashq-e-sitam dikhane ko shisha talash kar

jis rasm se ‘urus-e-wafa sharmsar ho

us rasm se farar ka rasta talash kar

paki-e-ruh-o-tazkiya-e-qalb ke liye

'irfan-e-zat ka hi zariya talash kar

hirs-o-hawas ki dhup basarat na chhin le

'betab' dil ki aankh ka surma talash kar