be-dilon ki aabru rah jaegi

be-diloñ kī aabrū rah jā.egī

dil na hogā aarzū rah jā.egī

tāqat-e-dīdār kitnī hī sahī

phir bhī tere rū-ba-rū rah jā.egī

DhūñDne vaalā hī ḳhud kho jā.egā

justujū hī justujū rah jā.egī

ḳhūn-e-dil ko kuchh agar taufīq ho

chashm-e-tar kī aabrū rah jā.egī

be-mahābā us ko ai 'nātiq' na dekh

ārzū-e-guftugū rah jā.egī

be-dilon ki aabru rah jaegi

dil na hoga aarzu rah jaegi

taqat-e-didar kitni hi sahi

phir bhi tere ru-ba-ru rah jaegi

DhunDne wala hi KHud kho jaega

justuju hi justuju rah jaegi

KHun-e-dil ko kuchh agar taufiq ho

chashm-e-tar ki aabru rah jaegi

be-mahaba us ko ai 'natiq' na dekh

aarzu-e-guftugu rah jaegi