be-ghari ka apni ye izhaar kam kar dijiye

be-gharī kā apnī ye iz.hār kam kar dījiye

sher meñ zikr-e-dar-o-dīvār kam kar dījiye

apnī tanhā.ī meñ itnā bhī ḳhalal achchhā nahīñ

aap apne aap se guftār kam kar dījiye

dushmanoñ kī ḳhud-ba-ḳhud ho jā.egī ta.adād kam

yāroñ kī fihrist meñ kuchh yaar kam kar dījiye

jab tavajjoh hī nahīñ maujūdgī kis kaam kī

is kahānī meñ mirā kirdār kam kar dījiye

sochiye ab itne chāragar kahāñ se ā.eñge

muskurā kar apne kuchh bīmār kam kar dījiye

aap kī bātoñ meñ aa kar jaan se to jā chuke

ab to in meñ zahr kī miqdār kam kar dījiye

be-ghari ka apni ye izhaar kam kar dijiye

sher mein zikr-e-dar-o-diwar kam kar dijiye

apni tanhai mein itna bhi KHalal achchha nahin

aap apne aap se guftar kam kar dijiye

dushmanon ki KHud-ba-KHud ho jaegi tadad kam

yaron ki fihrist mein kuchh yar kam kar dijiye

jab tawajjoh hi nahin maujudgi kis kaam ki

is kahani mein mera kirdar kam kar dijiye

sochiye ab itne chaaragar kahan se aaenge

muskura kar apne kuchh bimar kam kar dijiye

aap ki baaton mein aa kar jaan se to ja chuke

ab to in mein zahr ki miqdar kam kar dijiye