be-gunahi ki saza denge tere shahr ke log

be-gunāhī kī sazā deñge tire shahr ke log

mujh ko dīvāna banā deñge tire shahr ke log

shāh-rāhoñ pe hamesha na milā kar mujh se

tujh pe ilzām lagā deñge tire shahr ke log

tū mirā zikr na kar merā kahīñ naam na le

aag paanī meñ lagā deñge tire shahr ke log

shaam hote hī dimāġhoñ pe junūñ chhā.egā

koī afvāh uḌā deñge tire shahr ke log

merī āñkhoñ meñ TaToleñge sab apne chehre

aa.ina mujh ko banā deñge tire shahr ke log

aa ke baiThūñgā kisī din jo ghaḌī bhar ke liye

tere āñgan se uThā deñge tire shahr ke log

hādisa raat kā huuñ maiñ mirī vaq.at kyā hai

sub.h hote hī bhulā deñge tire shahr ke log

jāntā huuñ mujhe pyāsā to na rahne deñge

kam se kam zahr pilā deñge tire shahr ke log

apne kāñdhoñ pe uThā.e hue jaate haiñ 'azīz'

mujh ko miTTī meñ milā deñge tire shahr ke log

be-gunahi ki saza denge tere shahr ke log

mujh ko diwana bana denge tere shahr ke log

shah-rahon pe hamesha na mila kar mujh se

tujh pe ilzam laga denge tere shahr ke log

tu mera zikr na kar mera kahin nam na le

aag pani mein laga denge tere shahr ke log

sham hote hi dimaghon pe junun chhaega

koi afwah uDa denge tere shahr ke log

meri aankhon mein TaTolenge sab apne chehre

aaina mujh ko bana denge tere shahr ke log

aa ke baiThunga kisi din jo ghaDi bhar ke liye

tere aangan se uTha denge tere shahr ke log

hadisa raat ka hun main meri waqat kya hai

subh hote hi bhula denge tere shahr ke log

jaanta hun mujhe pyasa to na rahne denge

kam se kam zahr pila denge tere shahr ke log

apne kandhon pe uThae hue jate hain 'aziz'

mujh ko miTTi mein mila denge tere shahr ke log