بے حسی اب کے عجب دل پہ کوئی طاری ہے

بے حسی اب کے عجب دل پہ کوئی طاری ہے

آنکھ میں اشک نہیں کیسی عزا داری ہے

صبح تک پھر سے ہمیں جاگتے رہنا ہوگا

آج کی رات بھی لگتا ہے بہت بھاری ہے

اپنی غربت کو چھپا رکھا ہے اس دنیا سے

بڑی مشکل سے سنبھالی ہوئی خودداری ہے

ذائقہ چکھا زباں نے تو یہ محسوس ہوا

پانی اشکوں کا تو سچ مچ ہی بہت کھاری ہے

چھوڑ سکتے ہو نہ تم مجھ کو نہ اب میں تم کو

تم ہی بتلاؤ بھلا کیسی یہ لاچاری ہے

تم کو مشرق میں تو مغرب میں مجھے لا پھینکا

دوش اپنا نہیں یہ وقت کی عیاری ہے

اپنے حصے کا ہر اک جان کو سہنا ہے عذاب

آج تیری ہے تو پھر کل کو مری باری ہے