be-intiha jale hain tujhe DhunDte hue

be-intihā jale haiñ tujhe DhūñDte hue

ranj-o-alam baḌhe haiñ tujhe DhūñDte hue

kuchh bhī to terī yaad meñ achchhā nahīñ rahā

ham dar-ba-dar phire haiñ tujhe DhūñDte hue

chashm-e-talāsh se bhī tū aage nikal gayā

ham to vahīñ khaḌe haiñ tujhe DhūñDte hue

maḳhsūs ik madār meñ rahte the sāda-dil

bāhar nikal paḌe haiñ tujhe DhūñDte hue

ham ko tirī talāsh baḌī saḳht-jān hai

din raat ro rahe haiñ tujhe DhūñDte hue

vo rāsta ki jis kī na manzil kā kuchh patā

us par bhī ham chale haiñ tujhe DhūñDte hue

kal shab tire visāl kī ummīd bhī ga.ī

phir ashk-e-ḳhūñ bahe haiñ tujhe DhūñDte hue

'ābir' yaqīn-e-qalb se ik bārgāh meñ

ham bārhā jhuke haiñ tujhe DhūñDte hue

be-intiha jale hain tujhe DhunDte hue

ranj-o-alam baDhe hain tujhe DhunDte hue

kuchh bhi to teri yaad mein achchha nahin raha

hum dar-ba-dar phire hain tujhe DhunDte hue

chashm-e-talash se bhi tu aage nikal gaya

hum to wahin khaDe hain tujhe DhunDte hue

maKHsus ek madar mein rahte the sada-dil

bahar nikal paDe hain tujhe DhunDte hue

hum ko teri talash baDi saKHt-jaan hai

din raat ro rahe hain tujhe DhunDte hue

wo rasta ki jis ki na manzil ka kuchh pata

us par bhi hum chale hain tujhe DhunDte hue

kal shab tere visal ki ummid bhi gai

phir ashk-e-KHun bahe hain tujhe DhunDte hue

'abir' yaqin-e-qalb se ek bargah mein

hum barha jhuke hain tujhe DhunDte hue