be-kaif roz-o-shab bhi tumhaara KHayal bhi

be-kaif roz-o-shab bhī tumhārā ḳhayāl bhī

pahlū meñ tum bhī aur dil-e-pā.emāl bhī

ham TūTte hī jaate haiñ har roz roz-o-shab

go mere sāmne hai tumhārī misāl bhī

jiine ke tarz-o-taur pe maazī kī hai giraft

ab zehn-e-pā.emāl se maazī nikāl bhī

bālā.ī manziloñ se manāzir haiñ ḳhūb-tar

buniyād pe hai zarb imārat sañbhāl bhī

sikke ke donoñ ruḳh pe hamāre nishān haiñ

angusht-e-ḳhush-ḳhabar se vo sikka uchhāl bhī

insān bhī parind bhī sunñe ko be-qarār

dā.ūdī lahn aur azān-e-bilāl bhī

ab aa ke sar-nigūñ bhī hoī haiñ huzūr meñ

jab un ke paas kuchh na rahe yarġhamāl bhī

sabz aur niile rang kā joḌā ġhazab huā

vo chehra bhī gulāb thā aur lab the laal bhī

kab tak raheñ udaas raheñ kab tilak malūl

ab thoḌā dhaul-dhappā ho thoḌā dhamāl bhī

be-kaif roz-o-shab bhi tumhaara KHayal bhi

pahlu mein tum bhi aur dil-e-paemal bhi

hum TuTte hi jate hain har roz roz-o-shab

go mere samne hai tumhaari misal bhi

jine ke tarz-o-taur pe mazi ki hai giraft

ab zehn-e-paemal se mazi nikal bhi

baalai manzilon se manazir hain KHub-tar

buniyaad pe hai zarb imarat sanbhaal bhi

sikke ke donon ruKH pe hamare nishan hain

angusht-e-KHush-KHabar se wo sikka uchhaal bhi

insan bhi parind bhi sunne ko be-qarar

daudi lahn aur azan-e-bilal bhi

ab aa ke sar-nigun bhi hoi hain huzur mein

jab un ke pas kuchh na rahe yarghamal bhi

sabz aur nile rang ka joDa ghazab hua

wo chehra bhi gulab tha aur lab the lal bhi

kab tak rahen udas rahen kab tilak malul

ab thoDa dhaul-dhappa ho thoDa dhamal bhi