بے کیف ساعتوں سے شناسائی دے گیا

بے کیف ساعتوں سے شناسائی دے گیا

محفل میں بھی وہ گوشۂ تنہائی دے گیا

میں ہجر کی رتوں میں بھی کھل کر نہ رو سکی

کچھ اس طرح وہ درس شکیبائی دے گیا

آزاد کیا کیا اسے خود ہو گئے اسیر

زنجیر اپنی کل ہمیں سودائی دے گیا

نا بینا ساعتوں کو پرکھنا تھا اس لیے

گونگی سماعتوں کو بھی شہنائی دے گیا

ہر لفظ مجھ سے اذن سفر مانگتے ہوئے

چپ ہو کے مجھ کو طاقت گویائی دے گیا

ہم قربتوں کو جرم سمجھتے رہے مگر

یہ فاصلہ تو اور بھی رسوائی دے گیا

وہ خوشبوؤں کی رت کا گزرتا ہوا سفیر

بچپن تو لے گیا مگر انگنائی دے گیا