be-kaif saaton se shanasai de gaya

be-kaif sā.atoñ se shanāsā.ī de gayā

mahfil meñ bhī vo gosha-e-tanhā.ī de gayā

maiñ hijr kī rutoñ meñ bhī khul kar na ro sakī

kuchh is tarah vo dars-e-shakebā.ī de gayā

āzād kyā kiyā use ḳhud ho ga.e asiir

zanjīr apnī kal hameñ saudā.ī de gayā

nā-bīnā sā.atoñ ko parakhnā thā is liye

gūñgī samā.atoñ ko bhī shahnā.ī de gayā

har lafz mujh se izn-e-safar māñgte hue

chup ho ke mujh ko tāqat-e-goyā.ī de gayā

ham qurbatoñ ko jurm samajhte rahe magar

ye fāsla to aur bhī rusvā.ī de gayā

vo ḳhushbuoñ kī rut kā guzartā huā safīr

bachpan to le gayā magar añgnā.ī de gayā

be-kaif saaton se shanasai de gaya

mahfil mein bhi wo gosha-e-tanhai de gaya

main hijr ki ruton mein bhi khul kar na ro saki

kuchh is tarah wo dars-e-shakebai de gaya

aazad kya kiya use KHud ho gae asir

zanjir apni kal hamein saudai de gaya

na-bina saaton ko parakhna tha is liye

gungi samaaton ko bhi shahnai de gaya

har lafz mujh se izn-e-safar mangte hue

chup ho ke mujh ko taqat-e-goyai de gaya

hum qurbaton ko jurm samajhte rahe magar

ye fasla to aur bhi ruswai de gaya

wo KHushbuon ki rut ka guzarta hua safir

bachpan to le gaya magar angnai de gaya