be-karan samjha tha KHud ko kaise na-danon mein tha

be-karāñ samjhā thā ḳhud ko kaise nā-dānoñ meñ thā

āsmāñ bikhrā to har-sū shabnamī dānoñ meñ thā

maiñ ne jis ziine pe rakkhā pā to mujh ko Das gayā

jab bhī daana maiñ ne pheñkā saañp ke ḳhānoñ meñ thā

phir koī mauj-e-balā kaise mirā sar le ga.ī

ai ḳhudā mere ḳhudā tū bhī nigahbānoñ meñ thā

ik lahū kī buuñd thī lekin ka.ī āñkhoñ meñ thī

ek harf-e-mo'tabar thā aur ka.ī ma.anoñ meñ thā

sochte haiñ kis tarah is shahr meñ jiite rahe

āstīñ meñ saañp the aur zahr paimānoñ meñ thā

jaane kaisī thī 'mujībī' aag us ke lams kī

jism kā sonā pighal kar sab mirī rānoñ meñ thā

be-karan samjha tha KHud ko kaise na-danon mein tha

aasman bikhra to har-su shabnami danon mein tha

main ne jis zine pe rakkha pa to mujh ko Das gaya

jab bhi dana main ne phenka sanp ke KHanon mein tha

phir koi mauj-e-bala kaise mera sar le gai

ai KHuda mere KHuda tu bhi nigahbanon mein tha

ek lahu ki bund thi lekin kai aankhon mein thi

ek harf-e-mo'tabar tha aur kai manon mein tha

sochte hain kis tarah is shahr mein jite rahe

aastin mein sanp the aur zahr paimanon mein tha

jaane kaisi thi 'mujibi' aag us ke lams ki

jism ka sona pighal kar sab meri ranon mein tha