be-KHabar hone se pahle ki KHabar to dekhte

be-ḳhabar hone se pahle kī ḳhabar to dekhte

Dūbte sūraj kī jānib ik nazar to dekhte

chheḌ kar zikr-e-judā.ī sāmne us ke kabhī

us ke chehre se huvaidā us kā Dar to dekhte

dekhne us ko galī kī samt gar jaane ko the

auj par betābi-e-dīvār-o-dar to dekhte

jis ne milnā hī nahīñ hai us ko paane kī talāsh

be-vajah kar ke kabhī koī safar to dekhte

haath se chhū kar nahīñ to paas hī jā kar use

shahr meñ utrā hai ik rashk-e-qamar to dekhte

garmiyoñ meñ dasht-e-hijrāñ kā safar rakhnā kabhī

dhuup meñ jal kar samar dete shajar to dekhte

raat kī tārīkiyoñ meñ ghar se niklo to 'na'īm'

dekhte haiñ kis tarah se be-basar to dekhte

be-KHabar hone se pahle ki KHabar to dekhte

Dubte suraj ki jaanib ek nazar to dekhte

chheD kar zikr-e-judai samne us ke kabhi

us ke chehre se huwaida us ka Dar to dekhte

dekhne us ko gali ki samt gar jaane ko the

auj par betabi-e-diwar-o-dar to dekhte

jis ne milna hi nahin hai us ko pane ki talash

be-wajah kar ke kabhi koi safar to dekhte

hath se chhu kar nahin to pas hi ja kar use

shahr mein utra hai ek rashk-e-qamar to dekhte

garmiyon mein dasht-e-hijran ka safar rakhna kabhi

dhup mein jal kar samar dete shajar to dekhte

raat ki tarikiyon mein ghar se niklo to 'na'im'

dekhte hain kis tarah se be-basar to dekhte