be-KHabar hote hoe bhi ba-KHabar lagte ho tum

be-ḳhabar hote ho.e bhī bā-ḳhabar lagte ho tum

duur rah kar bhī mujhe nazdīk-tar lagte ho tum

kyuuñ na aa.uuñ saj sañvar kar maiñ tumhāre sāmne

ḳhush-adā lagte ho mujh ko ḳhush-nazar lagte ho tum

tum ne lams-e-mo'tabar se baḳhsh dī vo raushnī

mujh ko merī ārzūoñ kī sahar lagte ho tum

jis ke saa.e meñ amaañ miltī hai merī ziist ko

mujh ko jaltī dhuup meñ aisā shajar lagte ho tum

kyuuñ tumhāre saath chalne par na āmāda ho dil

ḳhushbū-e-ehsās mere ham-safar lagte ho tum

'nāz' tum par naaz kartī hai mohabbat kī qasam

zindagī bhar kī duāoñ kā asar lagte ho tum

be-KHabar hote hoe bhi ba-KHabar lagte ho tum

dur rah kar bhi mujhe nazdik-tar lagte ho tum

kyun na aaun saj sanwar kar main tumhaare samne

KHush-ada lagte ho mujh ko KHush-nazar lagte ho tum

tum ne lams-e-mo'tabar se baKHsh di wo raushni

mujh ko meri aarzuon ki sahar lagte ho tum

jis ke sae mein aman milti hai meri zist ko

mujh ko jalti dhup mein aisa shajar lagte ho tum

kyun tumhaare sath chalne par na aamada ho dil

KHushbu-e-ehsas mere ham-safar lagte ho tum

'naz' tum par naz karti hai mohabbat ki qasam

zindagi bhar ki duaon ka asar lagte ho tum